တရုတ်သည် အင်္ဂါဂြိုဟ်လေ့လာရေးယာဉ်တင်ဆောင်ထားသည့် ဒုံးပျံတစ်စင်းကို ဇူလိုင် ၂၃ ရက်တွင် အောင်မြင်စွာ လွှတ်တင်နိုင်ခဲ့ပြီဖြစ်သည်။
ထျန်းဝမ်- ၁ သို့မဟုတ် ကောင်းကင်ဘုံသို့ မေးခွန်းများ ဟု အမည်ပေးထားသည့် လေ့လာရေးယာဉ်တင်ဆောင်ထားသည့် Long March 5 ဒုံးပျံကို နိုင်ငံတောင်ပိုင်း ဟိုင်နန်ကျွန်းရှိ ဝန်ချန်းအာကာသယာဉ်လွှတ်တင်ရေးစခန်းမှ ဒေသဆိုင်ရာစံတော်ချိန် မွန်းလွဲ ၁၂ နာရီ ၄၀ မိနစ်တွင် လွှတ်တင်နိုင်ခဲ့ခြင်းဖြစ်ကြောင်း တရုတ်အမျိုးသား အာကာသစီမံခန့်ခွဲမှုဗဟိုဌာန(CNSA) က ထုတ်ပြန်ခဲ့သည်။
အာကာသလေ့လာရေးယာဉ်သည် အင်္ဂါဂြိုဟ်သို့ရောက်ရှိရန် ခုနစ်လအချိန်ယူရမည်ဖြစ်သည်။ အာကာယာဉ်သည် အင်္ဂါဂြိုဟ်ပတ်လမ်းသို့ရောက်ရှိပါက လေ့လာရေးယာဉ်သည် ဆင်းသက်ရေးအကူအညီဖြင့် အင်္ဂါဂြိုဟ်မျက်နှာပြင်သို့ ဆင်းသက်မည်ဖြစ်သည်။ အင်္ဂါဂြိုဟ်ပတ်လမ်းတွင် လှည့်ပတ်ပြီး လေ့လာခြင်း၊ ဂြိုဟ်မျက်နှာပြင်သို့ ဆင်းသက်သွားလာခြင်းနှင့် ဂြိုဟ်ဝန်းကျင်အခြေအနေကို စူးစမ်းခြင်းဆိုသည့် တာဝန်သုံးရပ်ကို ထမ်းဆောင်မည်ဖြစ်သည်။
ရှေးစာဆို ချူယွန်၏ ကဗျာတစ်ပုဒ်၏အမည်ကိုအစွဲပြုကာ အာကာသယာဉ်ကို အမည်ပေးထားခြင်းဖြစ်သည်။ အာကာသစူးစမ်းလေ့လာမှုအပြင် လူငယ်များကြား သိပ္ပံချစ်စိတ်ရှိလာရေးအတွက်ရည်ရွယ်ကာ အာကာသယာဉ်ကို အမည်ပေးထားခြင်းဖြစ်ကြောင်း အာကာသစီမံခန့်ခွဲမှုဗဟိုဌာနက ပြောဆိုခဲ့သည်။
