အာဆင်နယ်သည် စက်တင်ဘာ ၁၂ ရက်က ပရီးမီးယားလိဂ်ပွဲစဉ်(၁)အဖြစ် ဖူလ်ဟမ် ကွင်းသို့သွားရောက်ကစားခဲ့ရာ ကစားသမားသစ် ဝီလျံ၏ ခြေစွမ်းပြမှုနှင့်အတူ သုံးဂိုးပြတ် အနိုင်ရရှိခဲ့ကြောင်း သိရသည်။
အာဆင်နယ်ပွဲထွက်လူစာရင်းတွင် လာကာဇက်တီ၊ အော်ဘာမီယန်၊ ဝီလျံ၊ ဇာကာနှင့် အယ်နီနီတို့ပါဝင်ခဲ့ပြီး ဖူလ်ဟမ် တိုက်စစ်ကို ကာမာရာ ဦးဆောင်ခဲ့သည်။ အာဆင်နယ်သည် ၈ မိနစ်၌ပင်ဂိုးရခဲ့ပြီး လာကာဇက်တီက သွင်းယူခဲ့သည်။ ချယ်လ်ဆီးမှပြောင်းရွှေ့ခဲ့သော ဘရာဇီးသား ဝီလျံသည် ၄၉ မိနစ်တွင် ဂါဘရီရယ်ဂိုးသွင်းနိုင်ရန် ဖန်တီးပေးခဲ့ပြီး ၅၇ မိနစ်၌လည်း အော်ဘာမီယန်ဂိုးသွင်းယူနိုင်ရန်လည်း ဖန်တီးပေးခဲ့သည်။
အာဆင်နယ်နည်းပြ အာတီတာက လေ့ကျင့်ရေးကွင်းတွင် ပြုလုပ်နိုင်ခဲ့သည့်အတိုင်း စွမ်းအားပြည့် ကစားနိုင်ခဲ့ကြောင်း၊ ကစားသမားများအားလုံးမှာ အမှန်တကယ်ကြိုးစားခဲ့ကြောင်း ပွဲအပြီး၌ပြောကြားခဲ့သည်။ တန်းတက်ဖူလ်ဟမ်အသင်းနည်းပြ စကော့ပါကားက နေရာအလိုက်တိုးတက်မှုရှိစေရန်အတွက် ကစားသမား သစ်များခေါ်ယူရန် လိုအပ်နေကြောင်း ဖွင့်ဟခဲ့သည်။
