အော့ကလန်၌လည်း လူ ၁၀၀ အထိစုဝေးခွင့်ပြုခြင်းအပါအဝင် ဖြေလျှော့မှုတချို့ကို ပြုလုပ်ခဲ့သည်။ သို့သော် နယူးဇီလန်ရှိ အကြီးဆုံးမြို့ဖြစ်သော အော့ကလန်၌ ကူးသန်းသွားလာမှုကန့်သတ်ချက်များကို ဖြေလျှော့ရန် အချိန်ယူရဦးမည်ဖြစ်ကြောင်း အာဒန်ကပြောဆိုခဲ့သည်။

တစ်နိုင်ငံလုံး ပူးပေါင်းဆောင်ရွက်မှုကြောင့် ဗိုင်းရပ်စ်ကူးစက်မှုကို ထိန်းချုပ်နိုင်ခဲ့ခြင်းဖြစ်ပြီး အော့ကလန်သည် ကူးစက်မှုဗဟိုချက်ဖြစ်သောကြောင့် သတိထားရဦးမည်ဖြစ်ကြောင်း အာဒန်က အော့ကလန်၌ သတင်းထောက်များကို ပြောဆိုခဲ့သည်။

လူဦးရေ ငါးသန်းရှိသော နယူးဇီလန်၌ ယခုနှစ်အစောပိုင်းတွင် COVID-19 ကူးစက်မှုကို ထိန်းချုပ်နိုင်ခဲ့သော်လည်း သြဂုတ်တွင် အော့ကလန်၌ အစုလိုက်အပြုံလိုက်ကူးစက်မှုရှိလာသောကြောင့် မြို့ကို ကူးသန်းသွားလာမှုပိတ်ပင်ခဲ့ရသည်။

နယူးဇီလန်၌ စက်တင်ဘာ ၂၁ ရက်တွင် COVID-19 ကူးစက်သူသစ်မရှိခဲ့ချေ။ နယူးဇီလန်၌ COVID-19 ကူးစက်သူ ၁၄၆၄ ဦးနှင့် သေဆုံးသူ ၂၅ ဦးရှိနေသည်။

ယခုလအကုန်တွင် COVID-19 ကို အပြီးသတ်နှိမ်နင်းနိုင်ခြေသည် ၅၀ ရာခိုင်နှုန်းသာရှိနေသောကြောင့် စည်းမျဉ်းများကို ဆက်လက်လိုက်နာရန် လိုအပ်နေသေးကြောင်း ကျန်းမာရေးဝန်ကြီးဌာန၏သုံးသပ်ချက်အရသိရသည်ဟု အာဒန်ကပြောဆိုခဲ့သည်။ နယူးဇီလန်၌ အောက်တိုဘာ ၁၇ ရက်တွင် အထွေထွေရွေးကောက်ပွဲကျင်းပရန် စီစဉ်ထားသည်။

COVID-19 ကိုအောင်မြင်စွာထိန်းချုပ်နိုင်ခဲ့သောကြောင့် အာဒန်သည် လူကြိုက်များခံနေရသည်။ သို့သော် မဲဆွယ်စည်းရုံးမှုတစ်ခုအတွင်း ကျန်းမာရေးစည်းမျဉ်းများနှင့်အညီ ခပ်ခွာခွာမနေဘဲ ထောက်ခံသူများနှင့်အတူ အုပ်စုဓာတ်ပုံရိုက်ခဲ့မှုကြောင့် အတိုက်အခံ အမျိုးသားရေးပါတီခေါင်းဆောင် ဂျူးဒစ် ကောလင်းစ်က အာဒန်အား စက်တင်ဘာ ၂၁ ရက်တွင် ဝေဖန်ပြောဆိုခဲ့သည်။

အာဒန်ကလည်း အမှားကို ဝန်ခံခဲ့သည်။ တစ်ဦးနှင့်တစ်ဦး ခပ်ခွာခွာနေခဲ့ဖို့သင့်ကြောင်း ၎င်းကပြောဆိုခဲ့သည်။