ကသာမြို့တွင် Quarantine ဝင်ရောက်နေသည့် ကျား၂၁ ဦး၊ မ ၁၇ဦး စုစုပေါင်း ၃၈ ဦးကို Swab ရယူပြီးအောက်တိုဘာ ၂၃ ရက်က မန္တလေးမြို့ရှိ အမျိုးသားကျန်းမားရေး ဓာတ်ခွဲဌာနသို့ပေးပို့စစ်ဆေးရာတွင် ကနဦးတွေ့ရှိချက်အရ ငါးဦးတွင် COVID-19 ရောဂါပိုးတွေ့ရှိကြောင်း အဖြေထွက်ရှိခဲ့ပြီး ကျန် ၃၃ ဦးအား ဆက်လက်စစ်ဆေးမည်ဖြစ်သည်။

''အခု Positive ငါးဦးကလည်း Quarantine ကို တိုက်ရိုက်ဝင်ခဲ့ကြတာပါ။ သူတို့ငါးဦးစလုံး ဆေးရုံက ICU ကို ညတွင်းချင်းပို့ဆောင်ပေးပြီးပါပြီ ' ဟု ကသာမြို့ မျိုးဆက်သစ်လူငယ် လူမှုကူညီကယ်ဆယ်ရေးအသင်းမှယာဉ်မောင်းဦးမင်းသန်းထိုက်က ပြောသည်။

COVID-19 အတည်ပြုလူနာငါးဦးမှာ အသက်(၄၃)နှစ်အရွယ်အမျိုးသားတစ်ဦး၊ အသက်(၅၈)နှစ်အမျိုးသားတစ်ဦး၊အသက်(၄၉)နှစ်အရွယ်အမျိုးသမီးတစ်ဦး၊ အသက်(၇၆)နှစ်အမျိုးသမီးတစ်ဦးနှင့် မန္တလေးမြို့ဦးနှောက်နှင့် အာရုံကြောကလေးဆေးရုံမှ ဆေးကုသမှုခံယူ၍ပြန်လာသည့်တစ်လခွဲသားအရွယ်က လေးငယ်လေးတစ်ဦးတို့ဖြစ်ကြောင်း သိရသည်။

''ကျွန်တော်က မြို့ဝင်မြို့ထွက်မှာတာဝန်ယူထားရတယ်။ ပြောချင်တာအဓိကကတော့စစ်ဆေးဂိတ်ကို ရောက်လာတဲ့သူတွေဟာခရီးသွား ရာဇဝင်ကိုအမှန်တိုင်းပြောဖို့လိုပါတယ်။ ဂိတ်မှာတော့ ခရီးသွားခရီးပြန်နဲ့ လာသမျှကိုအကုန်စိစစ်တယ်။ ခုတွေ့ရတာကခရီးသွား၊ ခရီးပြန်ကနေ ပိုးတွေ့တာပါ။မြို့တွင်းမှာ ကျန်းမာရေးအသိပညာပေးထားတဲ့အတိုင်း လိုက်နာရင် မြို့တွင်းကူးစက်မှုမရှိပဲ ရပ်နိုင်တယ်လို့ ကျွန်တော်ထင်ပါတယ်''ဟု ကသာမြို့ ပရဟိတ လူငယ်များ ကွန်ရက်လူထုအကျိုးပြု အသင်းဥက္ကဌ ဦးတင်မြင့်အောင်က ပြောသည်။