၂၀၁၅ ခုနှစ်အတွင်း ယင်းဒေသများရှိ တိုင်းရင်းသားပါတီများနှင့် ဆွေးနွေးညှိနှိုင်းမှု မရှိခဲ့သည့် NLD သည် လွှတ်တော် ဥက္ကဋ္ဌနှင့် ဒုတိယဥက္ကဋ္ဌနေရာများကို အနိုင်မရရှိခဲ့ဘဲ ရှမ်းပြည်တွင် ပြည်ခိုင်ဖြိုး ကိုယ်စားလှယ်များနှင့် ရခိုင်တွင် ANP ပါတီတို့က အနိုင် ရရှိခဲ့ကြသည်။

ထို့ကြောင့် NLD ပြောခွင့်ရ ပုဂ္ဂိုလ်လည်းဖြစ်၊ ဗဟိုအလုပ်မှုဆောင် ကော်မတီဝင် တစ်ဦးလည်းဖြစ်သည့် ဒေါက်တာ မျိုးညွန့်က “ ဒါက လိုအပ်လို့ရှိရင် သီးခြားဆွေးနွေးရမှာပေါ့ ခင်ဗျာ ” ဟု မြန်မာတိုင်းမ်သို့ ပြောသည်။

ယင်းလွှတ်တော်များအတွင်း အတူတကွတွဲ၍ အလုပ်လုပ်ကြရမည်ဖြစ်သည့်အတွက် လိုအပ်ပါက ဆွေးနွေးရမည်ဖြစ်ကြောင်း ၎င်းက ပြောသည်။

“ ဒါကတော့ သီးခြားအခြေအနေဖြစ်ပါတယ်။ ဒါက လွှတ်တော်ရေးရာ ကိစ္စပိုင်းက ကိစ္စတွေက သပ်သပ်ပါ။ ကျွန်တော်တို့ကတော့ အခုက အနာဂတ်ပြည်ထောင်စုသစ် ဖွဲ့ရေးအတွက်ဆိုတော့ ဒီမိုကရေစီဖက်ဒရယ် ပြည်ထောင်စုရဲ့ပုံစံနဲ့ ပိုဆိုင်ပါတယ်။ လတ်တလော လွှတ်တော်ပုံစံမျိုးမဟုတ်ဘဲနဲ့။ လတ်တလောကိစ္စပေါ် မူတည်ပြီး ဖိတ်ခေါ်တာ မဟုတ်ပါဘူး ” ဟု ဒေါက်တာ မျိုးညွန့်က ဆက်ပြောသည်။

၂၀၂၀ ရွေးကောက်ပွဲတွင် ရှမ်းပြည်နယ်၌ NLD က ၂၉ နေရာနှင့် တိုင်းရင်းသားရေးရာ ဝန်ကြီး ၄ နေရာ အနိုင်ရခဲ့ပြီး ကျားခေါင်းပါတီဟုလူသိများသည့် SNLD က ၂၆ နေရာနှင့် ကြံ့ခိုင်ရေးပါတီက ၂၄ ‌နေရာအနိုင်ရခဲ့သည်။

ထို့ပြင် တအာင်းပလောင် အမျိုးသားပါတီ (TNP)က ၇ နေရာ၊ ပအိုဝ်းအမျိုးသားအဖွဲ့ချုပ်ပါတီ(PNO)က ၇ နေရာ၊ ‘ဝ’အမျိုးသားပါတီ(WNP)က ၂ နေရာ၊ လားဟူအမျိုးသားဖွံ့ဖြိုးတိုးတက်ရေးပါတီ(LNDP)က ၂ နေရာ၊ ကျားဖြူပါတီဟု လူသိများသည့် SNDP က ၁ နေရာ၊ ကယန်းအမျိုးသားပါတီ(KNP)က ၁ နေရာနှင့် တစ်သီးပုဂ္ဂလက ၁ နေရာတို့လည်း အနိုင်ရရှိခဲ့သည်။

ထို့ပြင် ရခိုင်ပြည်နယ်၌ ရခိုင်အမျိုးသားပါတီ(ANP)က အများဆုံးအနေဖြင့် ပြည်နယ်လွှတ်တော်တွင် ၇ နေရာ၊ NLD က ၄ နေရာနှင့် တိုင်းရင်းသား လူမျိုးရေးရာဝန်ကြီး ၁ နေရာ၊ ANPပါတီမှ ခွဲထွက်ပါတီဖြစ်သည့် ရခိုင့်ဉီးဆောင်ပါတီ(AFP)က ၂ နေရာတို့ဖြင့် အသီးသီးအနိုင်ရခဲ့သည်။

ထို့ကြောင့် NLD အနေဖြင့် ရှမ်းနှင့် ရခိုင်တို့တွင် လွှတ်တော်ဥက္ကဋ္ဌ၊ ဒုတိယ ဥက္ကဋ္ဌအပါအဝင် လွှတ်တော်ဖွဲ့စည်းနိုင်ရေးအတွက် ဒေသခံတိုင်းရင်းသားပါတီများနှင့် ဆွေးနွေးသွားရဖွယ်ရှိကြောင်း သိရသည်။

လက်ရှိ ရှမ်းပြည်နယ်လွှတ်တော်၌ ပြည်ခိုင်ဖြိုးပါတီ ကျိုင်းတုံ မဲဆန္ဒနယ်အမှတ် ၁ မှ ဉီးစိုင်းလုံဆိုင်က ဥက္ကဋ္ဌ၊ ရွာငံမဲဆန္ဒနယ်အမှတ် ၂ မှ ဉီးစဝ်အောင်မြတ်က ဒုတိယဥက္ကဋ္ဌတို့ဖြင့်လည်းကောင်း၊ ရခိုင်ပြည်နယ်၌ ANP ပါတီက ဉီးစံကျော်လှက ဥက္ကဋ္ဌ၊ ဉီးဖိုးမင်းက ဒုတိယဥက္ကဋ္ဌတို့အဖြစ် အသီးသီး တင်မြှောက်ခံထားရသည်။

နိုဝင်ဘာ ၈ ရက် ရွေးကောက်ပွဲ၌ NLD ပါတီသည် ပြည်သူ့လွှတ်တော်တွင် ၂၅၈ နေရာ၊ အမျိုးသား လွှတ်တော်တွင် ၁၃၈ နေရာ၊ ပြည်နယ်နှင့် တိုင်းဒေသကြီးလွှတ်တော်တွင် ၅၀၁ နေရာနှင့် တိုင်းရင်းသား လူမျိုးရေးရာ ဝန်ကြီးနေရာတွင် ၂၃ နေရာ စုစုပေါင်း ၉၂၀ နေရာအထိ အနိုင်ရခဲ့သည်။