ပြည့်စုံသည့်ဘုန်းကြီးကျောင်းတိုက်များအတွက် ဆွမ်းခံမထွက်ရခြင်းသည်အခက်အခဲမရှိနိုင်သော်လည်း ကျောင်းတိုက်အများစုသည် ရပ်ကွက်နေ ဆွမ်းဒါယကာ၊ဒါယိကာမများ၏ ဆွမ်းလောင်းလှူမှုဖြင့်သာ ဆွမ်းကိစ္စအတွက် ပြေလည်အောင် ဖြေရှင်းနေကြရခြင်းဖြစ်သည်။

လက်ရှိတွင် ကျောင်းတိုက်များအတွင်းပြင်ပ လူစိမ်းများ အလွယ်တကူဝင်ထွက်မှုမပြုလုပ်နိုင်ရန် တင်းကြပ်စွာတားမြစ်ထားကြောင်း မန္တလေးမြို့၊ ချမ်းအေးသာစွမြို့နယ်၊ မိုးကောင်းတိုက်၊ အောင်မြေချမ်းသာကျောင်းမှ မြို့နယ်သာသနာတော်ထိန်းသိမ်းစောင့်ရှောက်ရေးအဖွဲ့ဝင် ဆရာတော်ဦးကဝိန္ဒက မိန့်ကြားသည်။

''မနေ့ကနေ့လယ်ပိုင်းမှာ မြို့နယ်ကျန်းမာရေးဌာနကနေ ဆောင်ရန်ရှောင်ရန်အချက်အလက်တွေပါတဲ့ စာရွက်တွေနဲ့လာရောက်လျှောက်ထားကြတာဖြစ်ပြီးတချို့အချက်တွေကတော့ လိုက်နာဖို့ရာအဆင်မပြေတာတွေ ရှိတယ်။ ကျယ်ဝန်းတဲ့ကျောင်းတိုက်ကြီးတွေမှာတော့ တစ်ပါးနဲ့တစ်ပါး ၆ ပေခွာ သီတင်းသုံးဖို့တို့၊တစ်ပါးတည်း ဆွမ်းဘုဉ်းပေးဖို့တို့က လိုက်နာဖို့မခက်ပေမယ့် နေရာကျဉ်းတဲ့ ကျောင်းငယ်လေးတွေမှာကျတော့ အခက်အခဲရှိပါတယ်။ အထူးသဖြင့်ကတော့ဆွမ်းကိစ္စပေါ့။ ရပ်ကွက်တွေထဲက ဒါယကာ၊ဒါယိကာမတွေရဲ့ နေ့စဉ် ဆွမ်းလောင်းလို့သာ ဆွမ်းခံထွက်ကြွနေတာဖြစ်ပြီးလုံးဝထွက်လို့မရဘူးဆိုရင်တော့ ဆွမ်းကိစ္စအတွက်ပင်ပန်းကြရလိမ့်မယ်။ လောလောဆယ်မှာတော့ ဆွမ်းခံထွက်တဲ့ သံဃာတွေကို အနီးအနားပဲ ဆွမ်းခံဖို့နဲ့ နှာခေါင်းစည်းနဲ့ Face shield စနစ်တကျတပ်ဖို့ ကျောင်းကိုပြန်လာတဲ့အခါ အဝင်မှာလက်သန့်ဆေးရည်နဲ့ ဆေးကြောဖို့တွေကို တိုက်အုပ်ဆရာတော်ကြီးတွေကနေမှာကြားထားကြပါတယ်''ဟု မိန့်သည်။

လက်ရှိ မန္တလေးမြို့၊ မဟာအောင်မြေမြို့နယ်အတွင်းရှိ မစိုးရိမ်တိုက်သစ်တွင်သီတင်းသုံးနေထိုင်ကြသည့် ရဟန်းနှင့် သာမဏေများအား ဒီဇင်ဘာ၂ရက်မှစတင်၍ COVID-19 ပိုးရှိ၊ မရှိစစ်ဆေးခဲ့ရာ ဒီဇင်ဘာ ၈ ရက်အထိရဟန်းနှင့် သာမဏေအပါး ၈ဝ ကျော်၌ COVID-19 ပိုးတွေ့ရှိထားခြင်းဖြစ်သည်။