'' Christmas နှင့် New Year ကာလတွေမှာ Stay at Home ကိုတင်းတင်းကျပ်ကျပ်ဆောင်ရွက်မှာပါ။နှစ်သစ်ကို ကျန်းမာစွာဖြင့်ဖြတ်သန်းနိုင်ဖို့ဆောင်ရွက်မှာပါ''ဟု ဦးဖြိုးမင်းသိန်းက ပြောဆိုထားသည်။ထို့ပြင် နှစ်သစ်ကူးညဖြစ်သည့်ဒီဇင်ဘာ ၃၁ ရက် ညပိုင်းတွင် အင်းယားကန်ပေါင်၌ အပန်းဖြေလည်ပတ်ခွင့်နှင့် နှစ်သစ်ကြိုဆိုမှုအား ကိုဗစ်စည်းကမ်းများနှင့်အညီခွင့်ပြုမည်ဆိုသည့်သတင်းအား ပြည်တွင်းသတင်းဌာနတစ်ခုက ဖော်ပြထားမှုအပေါ်ဖေ့စ်ဘွတ်ခ်သုံးစွဲသူတချို့က ဝေဖန်ပြောဆိုမှုမြင့်တက်နေမှုကိုလည်း ဖြေရှင်းပြောဆိုခဲ့သည်။

''မဖွင့်ပါဘူး။ တင်းကျပ်မှာပါ''ဟု ဦးဖြိုးမင်းသိန်းက ပြောဆိုခဲ့သည်။ဒီဇင်ဘာ ၁၈ ရက် ညနေပိုင်းအထိ ကျန်းမာရေးနှင့်အားကစားဝန်ကြီးဌာန၏ထုတ်ပြန်ချက်အရ ရန်ကုန်တိုင်းဒေသကြီးတွင် COVID-19 ရောဂါပိုးတွေ့ရှိသူများ ၆၅၂ ဦးအထိရှိခဲ့ကြောင်း ထုတ်ပြန်ထားသည်။ ထို့ပြင် စျေးအချို့၌ နှာခေါင်းစည်းများတပ်ဆင်မှုမရှိခြင်း၊ စနစ်တကျတပ်ဆင်ခြင်းမရှိသူများ များပြားနေသည့်အတွက် ထိုကဲ့သို့စျေးရောင်းချသူများအား စျေးရောင်းချခွင့်မပြုရန်အတွက် ကျန်းမာရေးနှင့်အားကစားဝန်ကြီးဌာနက သက်ဆိုင်ရာစျေးတာဝန်ရှိသူများ၊ ကြီးကြပ်သူများအား အသိပေးတိုက်တွန်းပြောဆိုထားသည်။ ဒီဇင်ဘာ ၁၇ ရက် ညပိုင်းအထိ မြန်မာနိုင်ငံတွင် COVID-19 အတည်ပြု လူနာပေါင်း ၁၁၃ဝ၈၂ ဦးရှိပြီဖြစ်သည်။

ရန်ကုန်တိုင်းဒေသကြီးသည် လက်ရှိအချိန်အထိ ရောဂါဖြစ်ပွားမှုမြင့်တက်နေသည့်စာရင်းထဲတွင်ပါဝင်နေပြီး မြို့နယ်တစ်ခုမှအပ ကျန်မြို့နယ်အားလုံးအား Stay at Home အဖြစ်သတ်မှတ်ခံထားရသည်။ ရန်ကုန်တိုင်းဒေသကြီးပြည်လမ်းရှိ အင်းယားကန်ပေါင်သည် နှစ်သစ်ကူးကာလအပြင် အခြားသောပျော်ပွဲရွှင်ပွဲနေ့များ၌ လူစည်ကားများပြားတတ်သည့်နေရာဖြစ်သည်။