လှူဒါန်းပွဲအခမ်းအနားအား နမောတသ သုံးကြိမ်ရွတ်ဆို ဘုရားကန်တော့ဖွင့်လှစ်ကာ ဆရာတော်ကြီးများထံမှအလှူရှင် မိသားစုနှင့် ဧည့်ပရိသတ်များက ငါးပါးသီလ ခံယူဆောက်တည်ကြပြီး သန်လျင်မြို့နယ် ကြက်ခြေနီအသင်းခွဲ ဥက္ကဌ ဦးဆန်းလင်းနိုင်ကမြို့နယ်ကြက်ခြေနီ အသင်းခွဲ၏ လူမှုကရုဏာလုပ်ငန်း ဆောင်ရွက်နေမှုများအား ရှင်းလင်းလျှောက်ထား၍ အလှူရှင်မိသားစုမှ အသက်ကယ် အောက်စီဂျင်အိုးများနှင့် လူနာတင်ယာဉ်တစ်စီးကို ကြက်ခြေနီအသင်းခွဲထံသို့ ပေးအပ်လှူဒါန်းရခြင်းအား လျှောက်ထားခဲ့ကြသည်။

ဆက်လက်၍ အလှူရှင်မိသားစုမှ ဆရာတော်ကြီးများအား ဆွမ်းဆန်တော်၊ ဆီနှင့် နဝကာမ အလှူငွေများအား ဆက်ကပ်လှူဒါန်းပြီး သန်လျင်မြို့နယ် ကြက်ခြေနီ အသင်းခွဲသို့အသက်ကယ် အောက်စီဂျင်အိုးခြောက်လုံး၊ လူနာတင်ယာဉ်နှင့် သက်ဆိုင်သော ပိုင်ဆိုင်မှု စာရွက်စာတမ်းများအား လွှဲပြောင်းပေးအပ်ရာ သန်လျင်မြို့နယ် ကြက်ခြေနီအသင်းခွဲဥက္ကဌ ဦးဆန်းလင်းနိုင်က လက်ခံရယူပြီး အလှူရှင်မိသားစုအား ဂုဏ်ပြုမှတ်တမ်း ပြန်လည် ပေးအပ်ခဲ့ကြောင်းသိရသည်။

ထို့နောက် ဆရာတော်ကြီးများထံမှ အလှူရှင်မိသားစုနှင့် ဧည့်ပရိသတ်များက လှူဒါန်းမှုအစုစုအတွက် ရေစက်သွန်းချ တရားတော် နာယူခဲ့ကြပြီး အခမ်းအနားအား "ဗုဒ္ဓသာသနာစိရံတိဌတု" သုံးကြိမ်ရွတ်ဆို ရုပ်သိမ်း၍ ဆရာတော်ကြီးများအား နေ့ဆွမ်းနှင့် အချိုပွဲများ ဆက်ကပ်လှူဒါန်းခဲ့ကြသည်။

အဆိုပါ အသက်ကယ် အောက်စီဂျင်အိုးနှင့် လူနာတင်ယာဉ် တစ်စီးပေးအပ် လှူဒါန်းခြင်းအား ကျန်းမာရေးနှင့် အားကစားဝန်ကြီးဌာနမှ COVID-19 ကာလ ထုတ်ပြန်ထားသော စည်းကမ်းများနှင့်အညီ ပြုလုပ်ခဲ့ကြောင်းသိရသည်။