ဥရောပ ထိပ်သီးနိုင်ငံများဖြစ်ကြသည့် ဂျာမနီ၊ ပြင်သစ်၊ သြစတြီးယား နှင့် အီတလီတို့သည် လာမည့် ဒီဇင်ဘာ ၂၇ ရက်မှ စတင်ကာ ကာကွယ် ဆေး ထိုးနှံခြင်းလုပ်ငန်းများကို စတင်ဆောင်ရွက်မည်ဖြစ်ကြောင်း ကြေညာ ခဲ့သည်။

Pfizer မှ ထုတ်လုပ်သော ကာကွယ်ဆေးကို ဗြိတိန်နှင့် အမေရိကန် ပြည်ထောင်စုတို့တွင် ယခုလအစောပိုင်းမှစ၍ ထိုးနှံပေးနေပြီဖြစ်သည်။

ဥရောပဆေးဝါးအေဂျင်စီ (EMA) ၏ ခွင့်ပြုချက် ရရှိပြီဖြစ်ခြင်းကြောင့် ဥရောပသမဂ္ဂသည် ကာကွယ်ဆေး ဖြန့်ဖြူးခြင်းလုပ်ငန်းများကို ဆောင်ရွက် သွားမည်ဖြစ်ပြီး အီးယူအဖွဲ့ဝင်နိုင်ငံတိုင်းသို့ ဖြန့်ဖြူးပေးမည်ဖြစ်ကြောင်း ဥရောပကော်မရှင်ဥက္ကဋ္ဌ အာဆူလာဖွန်ဒါလိုင်းက ပြောကြားခဲ့သည်။

‘’ဒီကနေ့မှာတော့ ကျွန်မတို့ဟာ ဥရောပရဲ့ အောင်မြင်မှုသမိုင်းအစဉ် လာထဲကို အရေးပါတဲ့ ကဏ္ဍတစ်ခု ထပ်ပေါင်းထည့်နိုင်ခဲ့ပါပြီ။ COVID-19 ကို တိုက်ဖျက်ရာမှာ ထိရောက်ပြီး ဘေးကင်းမှုရှိတဲ့ ကာကွယ်ဆေးကို ကျွန်မ တို့ အတည်ပြုနိုင်ခဲ့ပါပြီ။ နောက်မကြာခင်မှာလည်း ကာကွယ်ဆေးတွေ ထပ် ရလာတော့မှာ ဖြစ်ပါတယ်’’ ဟု ၎င်းက ပြောကြားခဲ့သည်။

ထို့ပြင် Pfizer-BioNTech မှ ထုတ်လုပ်ထားသော ကာကွယ်ဆေးများ ကို ဥရောပနိုင်ငံများဆီသို့ တင်ပို့ပေးရန်အတွက် အဆင်သင့်အနေအထား ရှိ နေကြောင်းလည်း သက်ဆိုင်ရာကုမ္ပဏီက ထုတ်ပြန်ကြေညာခဲ့သည်။

ဥရော ပရှိ လူပေါင်းများစွာကို သေကြေပျက်စီးစေခဲ့သော ကပ်ရောဂါကြီးအား တိုက် ဖျက်ရေးအတွက် မိမိတို့ စောင့်ဆိုင်းနေသည့် သတင်းကောင်းတစ်ခု ရောက် ရှိလာခြင်းဖြစ်ကြောင်း အီတလီကျန်းမာရေးဝန်ကြီး ရောဘတ်တို စပါရန်ဇာ က ပြောကြားခဲ့သည်။

သို့ရာတွင် ဥရောပ၌ မျိုးရိုးဗီဇပြောင်း COVID-19 ဗိုင်းရပ်စ်တစ်မျိုး ပေါ်ပေါက်နေခြင်းကြောင့် ကူးသန်းသွားလာမှုများနှင့် နယ်စပ်ဝင်ပေါက်များ ကို ပိတ်ဆို့ထားရာ ကာကွယ်ဆေး ဖြန့်ဖြူးခြင်းလုပ်ငန်းစဉ်များအတွက် စိန် ခေါ်မှုများနှင့် အခက်အခဲများ ကြုံတွေ့ရနိုင်ကြောင်းလည်း သိရသည်။