လက်ရှိ၌ Fever Clinic Monywa အခမဲ့ဆေးပေးခန်းသို့ သာမန်ဖျားနာလူနာများအပြင် အနံ့ပျောက် သံသယလူနာများ လာရောက်ပြသသူဦးရေများလာသောကြောင့် တစ်ပတ်လျှင်ခြောက်ရက်နှုန်းဖြင့် ဇန်နဝါရီ ၆ ရက်မှစ၍ ဖွင့်လှစ်သွားမည်ဖြစ်ပြီး တနင်္ဂနွေတစ်ရက်သာ ဆေးခန်းပိတ်မည်ဖြစ်ကြောင်း သိရသည်။

Fever Clinic Monywa အခမဲ့ဆေးပေးခန်းကို စစ်ကိုင်းတိုင်းဒေသကြီးအစိုးရအဖွဲ့၏ လမ်းညွှန်မှုနှင့်အတူဆရာဝန်များအသင်း (မုံရွာ)၊ စစ်ကိုင်းတိုင်းဒေသကြီး လူငယ်ရေးရာကော်မတီ ၊ SAVE MONYWA ၊ မုံရွာတက္ကသိုလ်ကျောင်းသားများ သမဂ္ဂတို့နှင့် မြန်မာနိုင်ငံလူမှုကယ်ဆယ်ရေးအဖွဲ့ (မုံရွာ)တို့မှ ပူးပေါင်းဖွင့်လှစ်ထားခြင်းဖြစ်သည်။

ဖျားခြင်း၊ ချောင်းဆိုးခြင်း၊ လည်ချောင်းနာခြင်း၊ အသက်ရှူကြပ်ခြင်း၊အားအင်ကုန်ခမ်းနွမ်းနယ်ခြင်း၊ ချမ်းတုံခြင်း၊ ကိုယ်လက်နာကျင်ခြင်း၊ ခေါင်းကိုက်ခြင်း၊ ရုတ်တရက် အနံ့မရခြင်း၊အရသာပျောက်ခြင်းစသည့် ရောဂါလက္ခဏာ ခံစားနေရသူများကို ဆေးခန်းတွင် အခမဲ့ (အခမဲ့) ကုသပေးသည်။

ဆေးခန်းပြလိုသူများသည် Hotline Number ဝ၉ ၆၆ဝဝ ၁ဝဝဝဝ သို့ဆက်သွယ်၍ ကြိုတင်စာရင်းပေးသွင်းရမည်ဖြစ်ပြီး ဆေးခန်းမပြသမီ နံနက် ၈ နာရီမှ ၁၂ နာရီနှင့် ညနေ ၄ နာရီမှ ည ၉ နာရီအထိ ကြိုတင်စာရင်းပေးနိုင်ပြီး ဆရာဝန်တစ်ဦးက ဖုန်းလက်ခံ၍ရောဂါလက္ခဏာမေးမြန်းကာ စာရင်းသွင်းပေးလျက်ရှိကြောင်း သိရသည်။